الاسكندرانية تعالو هنا بسرعه
الاسكندرانية تعالو هنا بسرعه
السلام عليكم ورحمة الله وبركاته
انا عامله الموضوع ده علشان حابه اتكلم فيه عن نفسى وعن اسكندريه واحب انى اى حد يدخل يشارك فيه ويقول اى الحاجات اللى بيحبها فى اسكندريه وايه اكتر اماكن يحب يزرها واتمنى انكم تشركو فيه
احب اعرفكم بنفسى انا بك استجير سنى 26 من اسكندريه واحب اتكلم عن نفسى شويه وعن اسكندريه واوصف شويه من جمالها اللى انا بشوفه وبستمتع بيه اسكندريه يعنى البحر والهواء والسماء الصافيه والشمس الذهبيه اللى تدفيك فى عز البرد اسكندريه يعنى بحرى واهل بحرى والسياله والطابيه وحلقه السمك اسكندرية يبقى المينا الشرقية والسمك الى طالع من المياه والصيادين الغلابة وهما طالعين بمراكبهم اسكندريه يعنى المنشيه والرمل والنبى دنيال اسكندريه يعنى كتير وكتير وكتير مهما اقول مش هقدر اوصف من عشقى ليها ولبحرها وانا بستمتع بيه ولما اكون حزينه ولميانه بلهموم وبحرها يسمعنى ويريحنى لانه واسع وكبير وبسيع كتير برغم انه غدار بس وفى للاسرار يسمع ويريحنى برغم بحرك يا سكندريه برحله وانا عنيه مليانه دموع وحزن والم وارجع منه وانا مليانه فرح وامل فى الحياه من تانى اسكندريه يعنى وقت غروبك ومنظرك الهايل وخاصا عند القلعه وده مكانى المفضل لما اعد واستنى وقت غروب الشمس والمنظر الساحر الروعه وانا سرحانه فيه واحس فعلا براحه وانا بستمتع بلمنظر ده ولما اتمشى من الرمل لغايه استانلىوانا مستمتعه بلبحر والهواء الجميل وخاصا احب امشى فى الشتاء لانى بحس انى لوحدى انى البحر ده ليه انا لوحدى
هقولكم ايه ولا ايه ما انتم تلاقيكم زى ويمكن اكتر كمان انا هسيبكم دلوقتى مع كلمات احمد فؤاد نجم وهبقى ارجعلكم تانى
يا اسكندريه
بحرك عجايب
ياريت ينوبني م الحب نايب
تحدفني موجه
على صدر موجه
والبحرهوجه
والصيد مطايب
أغسل هدومي
وأنشر همومي
على شمسه طالعه
وأنا فيها دايب
كأني فلاح في جيش عرابي
مات ع الطوابي
وراح في بحرك
كأني نسمه فوق الروابي
م البحر جايه
تغرق في سحرك
كأني كلمه من عقل بيرم
كأني غنوه من قلب سيد
كأني جوا المظاهره طالب
هتف باسمك
ومات معيد
كأني صوت النديم
في ليلك
بيصحي ناسك
يشدوا حيلك
كأني طوبه من بيت في حاره
كأني دمعه
في عيون سهارى
كأني نجمه فوق الفناره
تهدي الحيارى
والبدر غايب
يا اسكندريه
يامصراويه
على سن باسم
على ضحكه هاله
البحر
شباك ومشربيه
وانتي الاميره
ع الدنيا طاله
يا اسكندريه عاشق
وبدوي
ارتاح في حضنك
والود ودي
يكون كلامي
عربون غرامي
وبالمحبه
ناخد وندي
يا اسكندريه فيكي الغلابه
ع الرزق يسعوا ولايناموش
صبح صباحهم
رجع مساهم
وزاد شقاهم
ومارتاحوش
يا عيني ع اللي الزمان تعبهم
وضاع تعبهم
ومالتقوش
نزل شبكهم
في بحر طامي
طلع شبكهم
على فاشوش
وفيكي بين البشر
ديابه
وفيكي فوق البشر
وحوش
وفيكي ناس مغرمين صبابه
لو خان زمانهم
مابيخونوش
وفيكي خمري
سلمت امري
ما اقدرش اشوفه
وما انيلوش
سمك يا بني يا اسكندراني
في العشق واحد
مالكش تاني
سمك يابني يا اسكندراني
في الحسن ساحر ومعجباني
سمك يابني
والعشـق غيه
تبدأ بنظره
تبقى ملاغيه
وكل عاشق وله بهيه
وكل شاعر وله اغاني
وأنا اللي عشق الصبايا كاري
أعشق وأغني ما اقدرش اداري
واي نظره بتجيب قراري
وايشحال عيونك
يا الاسمراني
تحياتى وتقديرى ليكم من بنت اسكندرية (( بك استجير))
موضوع: الاسكندرانية تعالو هنا بسرعه 
الجمعة يوليو 23, 2010 1:40 am